Þú þarft ekki nýtt kerfi til að fá gagn af gervigreind í rekstri. Best er að byrja á verkunum sem þú gerir nú þegar í hverri viku og taka eitt í einu.
Bókhald: undirbúningur, ekki bókun
Gervigreind er góð í að lesa reikninga og kvittanir, draga út birgja, upphæð, dagsetningu og virðisaukaskatt, og stinga upp á bókhaldslykli. Hún getur borið bankayfirlit saman við bókhaldið og bent á það sem passar ekki.
Sum bókhaldskerfi eru komin með beina tengingu við Claude, til dæmis QuickBooks (í beta). Ef þitt kerfi er ekki með tengingu dugar oft að flytja út CSV-skrá og vinna með hana.
Reglan: gervigreindin undirbýr, þú eða bókarinn samþykkir.
Laun: yfirferð fyrir útborgun
Launakeyrslan er þar sem villur eru dýrastar. Láttu gervigreindina bera tímaskráningar saman við launaseðla, finna frávik frá síðasta mánuði, eins og yfirvinnu, orlof eða nýja starfsmenn, og draga þau saman áður en greitt er. Hún á aldrei að greiða út sjálf.
Verkefnastjórnun: minni handavinna
Með tengingu við Asana, monday.com, Linear eða Jira getur Claude búið til verk úr fundargerð, tekið saman stöðuna í lok vikunnar og bent á það sem er komið fram yfir frest. Tenging við Slack eða Microsoft 365 gerir það sama úr spjallinu og tölvupóstinum.
Þrjú ráð áður en þú byrjar
- Veldu eitt verk sem tekur að minnsta kosti klukkustund á viku. Mældu tímann fyrir og eftir.
- Byrjaðu á lestri. Gefðu lesaðgang fyrst og skrifaðgang þegar þú treystir niðurstöðunum.
- Settu samþykki á allt sem kostar peninga. Í Team og Enterprise er hægt að stilla hverja aðgerð á Needs approval, svo ekkert er sent eða greitt án þess að manneskja ýti á takkann.
Þegar verklagið er komið í fastar skorður má skrifa það niður sem færni (e. skill), svo það sé gert eins í hvert skipti, sama hver biður um það.
Heimildir
- Use connectors to extend Claude’s capabilities: tengingar og heimildir á hverja aðgerð
- Connectors directory: bókhalds-, launa- og verkefnakerfi sem tengjast Claude
- What are skills?: hvernig verklag er vistað sem færni